MANADO – KawanuaPost.com – Manis Madu, mar lebe manis Tete Manis (Tuhan). Ini kata-kata ini yang paling pas torang warga Kota Manado mo kase ucapan pa torang pe Bapak Walikota Dr. SG Vicky Lumentut yang pas hari ini Tete Manis ada kase tamba umur satu taong.
Butul komang ini, bukang mo cari muka pa torang pe Walikota Manado, mar ini dapa lia masih poco-poco, biar so 56 taong. So 56 Taong, Mar Masih Fatsung kalo Anak Baru Gede (ABG) pe bahasa, biar so tua mar masih gagah. Awo, nyanda salah toh, kalo katu torang warga Manado babaling. Mar ini mo kase bilang ulang, bukang mo cari muka. Io toh.
Nyanda salah katu, kalo ada warga babilang tu dorang pe orang nomor satu di Manado ini, sampe skarang masih dapa lia fresco (poco-poco). Sama deng tu Om Ichad Remrhev (Seniman) ada builang, nyanda salah katu torang pe Walikota somo lima taong ada pimpin ini Kota Manado. Ini yang kita ada lia deng ada rasakan noh itu program-program Pak Vicky Lumentut yang butul-butul pro rakyat. Mar, ada jo noh itu orang laeng bilang, kalo kepemimpinan Pak Vivky Lumentut nyanda beres ato nyanda dapa lia deng nyanda ada beking apa-apa. Mar kalo kita komang, so musti puji noh, ini Manado so ada depe perubahan nyanda sama itu lalu-lalu, iyo toh?
Om Ichad ada bilang ampe sama deng itu Tanta Fe Darondo, sapa bilang Pak walikota nyanda beking apa-apa? Oooh komang salah itu noh. Ato itu orang ada bilang mo ganti Pa Pak Vicky mo jadi walikota.? Trus trang jo kita mo kase tau, kalo ada orang yang bilang Pak Vicky nyanda berhasil, kase baku mangada deng kita. Nanti kita kase tau pa dorang. Sagala jo orang bilang bagitu. Ini kua yang kita ada lia, so nyanda lama toh mo Pemilihan Walikota (Pilwakot) tanggal 9 desember 2015 toh. Ini stou karna dorang ada pa sponsor pa orang laeng mo jadi Walikota. Mar, jang jaga bicara nyanda butul kua. Sportif kuakalo mo dukung orang laeng. Deng kita lei nyanda parnah mo bacirita bisae itu calon laeng. Kalo mo bersaing, bersaing dengan otak sehat, supaya kalo jadi kasana, itu pikiran lebe dulu mob eking itu kepentingan masyarakat, bukang itu tim sukses pe mau, iyo toh, ungkap Tanta Fe Darondo warga Kdelurahan Bumi Beringin.
Di hari jadi (Hari Ulang Tahun) Pak Walikota Manado yang ka 56 taong ini, banya itu warga ada titip pesan, mar, beda-beda tipis deng itu Om Ichad Remrhev deng Tanta Fe darondo ada bilang. So itu di akhir torang ada babatanya, Om Ichad deng Tanta Fe bilang, so torang ini yang orang lebe dulu mo turung pa dorang pe tamang, keluarga deng laeng-laeng, kalo tanggal 9 Desember 2015 mo pilih, supaya Dr. SG Vicky Lumentut masih lima taong berikut mo pimpin ini Kota manado, pungkas Om Ichad deng Tanta Fe.
EDITOR : SOLSILARE.
